Под мотото „Слобода, креатива, вработување“, Младинскиот Образовен Форум пред десетина дена го започна проектот „Младинска независност“, онлајн кампања за поттикнување на младинскиот активизам во земјава.Воден примарно преку социјалните мрежи „Facebook“ и „Twitter“ и преку сопствената веб страница nezavisnost.org.mk, проектот има за цел, како што велат организаторите, „да создава и промовира можности за активизам во областа на комуникациите, визуелното изразување, новите медиуми, изведувачките и другите уметности.“
Кампањата ќе ја спроведуваат пет младински центри во различните универзитетски градови во земјава: Скопје, Штип, Тетово, Битола и Струга. Центрите се состојат од три клуба, или кластери:
-Вербал-кластер е клуб за дебата, односи со јавност и комуникација,
- Арт-кластер е клуб за изведувачки уметности, музика, алтернативен театар и други перформанси,
- Е-кластер е клуб за употреба и развој на нови медиуми, социјално вмрежување и аудиовизуелно изразување.
Освен активностите во рамките на овие клубови, центрите ќе одржуваат и обуки за работни вештини. Наменети за дипломирани студенти, овие работилници ќе учат вештини кои работодавците ги бараат на пазарот на трудот.
